水曜歌謠祭 - feverSound

我諗唔係好多人啱，但 J-POP 來講我真係聽工藤靜香（工藤静香）既歌大，佢最近出左隻 CD，少有上電視唱下歌做下宣傳，對我來說，呢兩集既「水曜歌謠祭」真係寶來，估唔到入面仲有好多歌手，包括谷村新司等，出來同班後生唱返好多經典好歌…

在香港未有高清（以前叫高解像）之前，我同好多影音發燒友一樣，好珍惜好喜愛日本既高清節目（當年「添置 16 樓」相信有返咁上下年資既朋友應該唔會陌生），其實時至今日，日本既高清節目，仍然好靚畫面，拍攝同製作亦好有心機。話時話，雖然我仲有幾 TB 既日本 HD 節目 Files，亦有近百餅 D-VHS 帶，但好老實，自從香港有自己既高清之後，我已經無睇日本高清咁滯，就算做示範或者朋友造訪，基本上都唔會再開日本 HD 俾人睇，試想想，J2 台有 Music Station，雖然 Bitrate 低少少但都叫高清，而且有中文字幕，可以週週免費任錄任睇，真係仲有吸引力？

其實我既年代係…

其實 Morning 娘我都仲有睇，但 AKB48 已經無再追，女歌手都係一樣，我仲停留響安室奈美惠同松浦亞彌既年代…更正一下，其實我既年代，應該係中山美穗、酒井法子同工藤靜香既年代，自從靜香同木村結婚後，傳媒對靜香好唔客氣，有水就抽有位就插，但無損我對佢既欣賞，有時間我會聽返佢既歌，當然係一個人既時候，朋友們好像沒有一個是喜歡她的，更甚者可能仲要係討厭她…

由於工藤靜香早前出左隻 CD，所以早前就出席了「周三音樂節目」「水曜歌謠祭」，因為工藤靜香自從嫁左俾木村之後，再加上早年發生意外撞到塊臉，已經好少出現幕前，所以當我知道呢個節目有佢，我已經好想睇，但奈何都唔知邊度有，所以只好等，結果有心人錄好剪好再放上 Youtube，仲要高清添，實在好開心。

[wp_bannerize group=”PageBanner” random=”1″ limit=”3″]

不過人又點會咁易滿足，我始終係好想睇晒全集，結果皇天不負有心人，正所謂，總有一個適合你既「百度云」在附近，心誠則靈，結果兩集既 TS 檔，順利收納！真係要多謝放 link 出來果位靜香粉絲。

收到全集無剪接檔案，俾著以前已經好滿足，但今日貪心一點，日本高清廣播主要仍然係 1440 x 1080 60i MPEG2 壓縮，而聲音則是 AAC 2.0 / 5.1，手上檔案是 TS，意味無添加直錄版本，但我想在我技術能力內提高一點聲畫效果，於是把畫面抽出來改為 1920 x 1080 60i H.264，Bitrate 提高至大約 12Mbps，轉好之後，由於畫面升頻只係用基本插植方式做，其實畫面看上來無乜大分別，只係細節高左少少，即係同以前 DVD 升線上 720p 咁，但都叫改善左，好過無。

至於聲音，檔案係 AAC 2.0，抽條音軌出來睇，Bitrate 很低，第一集得 64kbps，第二集仲衰得 54kbps，規格則係 16bit / 48kHz，聲音後期處理我比較有信心，用 Saracon 轉為 24bit / 48kHz PCM，再比較一下，嘩，有改善！再把心一橫，來多個 24bit / 96kHz，本來高壓縮的聲音，細節密度都有可聞的提高，仲掂！Saracon 果然是有料到！Daniel Weiss 絕非浪得虛名。

最後一步，就是將呢兩個節目，製作成對應藍光機既檔案，呢樣野對我反而無難度，因為差唔多八年前已經係做緊 DIY 藍光碟精華示範，然後壓返個檔案做 BD ISO，一隻 BD25 夠裝有餘，送俾同樣喜歡靜香既朋友，也是賞心樂事。